Муус устар 22 күнүгэр Тыараһа нэһилиэгэр Л.Н.Турнин аатынан “Алгыс” норуот айымньытын дьиэтигэр Саха Республикатын культуратын туйгуна, норуот айымньытын дьиэтин вокалга специалиһа Федора Собакина бырайыагынан “Тыыннаах дорҕоон” диэн баян уонна гитара доҕуһуолунан ырыа дьоро киэһэтэ буолан ааста.

   Бу киэһэ нэһилиэк 60-нус сыллардаахтан саҕалаан күн бүгүҥҥэ диэри уус-уран самодеятельноһын кыттыылаахтара, баянистара, гитаристара, ырыаһыттара кыттыыны ыллылар. Ытык Күөлтэн ыҥырыылаах ыалдьыт быһыытынан кэлбит эдэр баянист Петр Башарин ырыаһыттарга доҕуһуоллаан, ону сэргэ бэйэтэ баяны кытта тэҥинэн дудкаҕа Валерий Ноев “Күөрэгэй” ырыатын матыыбын оонньоон көрөөччүлэри олус сэргэхситтэ.

   60-70-нус сыллардаахха культура эйгэтигэр үлэлээбит, кырдьаҕас баянист Константин Толстяков, үгүс көлүөнэ ыччаты музыка эйгэтигэр уһуйбут учуутал, баянист Клавдия Мордовская, 70-нус сыллардаахтан күн бүгүҥҥэ диэри сыанаттан түспэккэ сылдьар ырыаһыттар, Ытык Күөлтэн анаан-минээн кытта кэлбит улуус тарбахха баттанар ырыаһыта, көмүс куолаһа, биир дойдулаахпыт Ольга Титова, Кыйы талба талааннаахтара Фекла Варфоломеева, Анна Иванова, Евдокия Чемпина, Анастасия Антонова баян доҕуһуолунун ыллаан, ааспыт кэми ахтан-санаан аастылар. 80-нус сыллардаахха “Мичээр” ВИА-ҕа оонньообут ыллаабыт кэргэннии Галина, Юрий Халыевтар, Анастасия Лексикина, Федора Собакина, Марфа Пономарева, 90-нус сыллардаах ыччаттар Прокопий Турнин, Петр Полускин гитаранан ырыаларын бэлэхтээтилэр. Анатолий Варламов, Вероника Чемпина-Варламова баян доҕуһуолунан ырыаларын көрөөччүлэр олус сэргии иһиттилэр. Дьоро киэһэни бүгүҥҥү күҥҥэ сыанаттан түспэ ырыаһыт уолаттарбыт Иван Говоров, Алексей Егоров, Вася Полускин, Коля Чехченнонов гитараҕа оонньоон, ыллаан түмүктээтилэр. Дьоро киэһэни Федора Собакина уонна Галина Полускина иилээн-саҕалаан ыыттылар. “Тыыннаах дорҕоон” ырыа киэһэтигэр анаан республикабыт араас муннугар культура эйгэтигэр үлэлии-хамсыы сылдьар ыччаттарбыт эҕэрдэлэрин устан ыыппыттара көрөөччүлэри долгутта. Ол курдук, Ленскэйтэн Оҕо искусствотын оскуолатын вокалга преподавателэ Людмила Сивцева, Дьокуускайтан Суорун Омоллоон аатынан Опера уонна Балет театрын хорун артыыһа Петр Бучугасов ыллаабыттарын, Республикатааҕы саха филармониятын симфоническай оркестрын артистката Нарыйа Антонова саксофоҥҥа оонньообутун, Томпо улууһун Кириэс-Халдьаайытыттан музыкальнай оскуолатын преподавателэ Марианна Слепцова фортепианоҕа оонньообутун устан ыыппыттар.

   Бу киэһэ араас көлүөнэ ырыата ылланан, ааспыт кэм талба талааннаах дьонун туһунан ахтан-санаан, дьоро кэм урукку кэми санатар хаартыскаларын проекторынан көрөн, көрөөччүлэр баян, гитара доҕуһуоллаах ырыа алыбар уйдаран, бары биир долгуҥҥа киирэн, үс чаас биллибэккэ ааста. Кыйы олохтоохторун сэргэ, аттынааҕы Чөркөөх сэлиэнньэтиттэн толору массыынанан, бэл тыраахтарынан тиийэ кэлэн көрөн, сылдьыбыт дьон дуоһуйа астынан, инникитин маннык тыыннаах доҕуһуолунан ырыа киэһэтин сыллата ыытыллар үгэскэ кубулутарга баҕа санааларын этэн тарҕастылар, тэрийээччилэргэ, кыттааччыларга барҕа махталларын биллэрдилэр.