Балаҕан ыйын 7 күнүгэр Тыараһа нэһилиэгэр балыыһа саҥа дьиэтэ арыллар үөрүүлээх күнэ буолан ааста. Бөһүөлэк килбэйэр киинигэр, Кыйы күөлүн өҥөйө турар кэрэ көстүүлээх сиргэ саҥа балыыһабыт дьиэтэ кыстыгы көрсө үлэҕэ киирэн, олохтоохтор үөрүүлэрэ муҥура суох буолла. Төһө да күһүҥҥү хахсаат тыаллаах тымныы күн турдар, саҥа балыыһа аһыллар үөрүүтэ илинтэн-арҕааттан ыҥырыылаах ыалдьыттары, олохтоохтору биир сиргэ түмэ тарта.

Кыйыга аан бастакы балыыһа - төрүүр пуун 1948 сыллаахха аһыллыбыт.1956 сыллаахха ахсынньы 1 күнүгэр амбулаторнай пуун, сытар икки куойалаах ФАП  буолбута. 1987 сыллаахха Кыйыга врачебнай амбулатория аһыллыбыта. 1991 с. участковай балыыһа аһыллан, 10 куойкалаах стационар тутуллан үлэҕэ киирбитэ. Балыыһа аан бастаан анал “Суһал көмө” массыыналаммыта. 2000 с. “2000 үтүө дьыала” хамсааһын чэрчитинэн балыыһаҕа саҥа дьиэ тутуллубута. 2023 сылтан Кыйы врачебнай амбулаториятын  сэбиэдиссэйинэн  терапевт-быраас Дальяна Эдуардовна Сунхалырова ананан, үлэлии-хамныы сылдьар. Коллектив күн бүгүн 6 үлэһиттээх , улууска үтүө көрдөрүүлээх биир бастыҥ доруобуйа харыстабылын тэрилтэтэ буолар.

Саҥа балыыһа тутуута бу сыл кулун тутар ыйыттан саҕаламмыта. Портнягин Игорь Андреевич салайааччылаах “Сахауниверсал” хааччахтаммыт эппиэтинэстээх тэрилтэ бэрт кылгас кэм иһигэр бары ирдэбилгэ эппиэттиир толору хааччыллыылаах объегы тутан, олохтоох дьаһалта ититии ситимигэр холбоон, уотун тардан, күрүөтүн-хаһаатын ситэрэн, саҥа объект кэмигэр үлэҕэ киирдэ. Тутуу үлэтин хара маҥнайгыттан бүтүөр диэри улуустааҕы киин балыыһа кылаабынай бырааһа Кононова Сардаана Владимировна тус хонтуруолугар илдьэ сылдьан, балыыһа үлэҕэ киириитигэр саҥа миэбэлинэн хааччыйан, олохтоохтор көрдөрүнэллэригэр, эмтэнэллэригэр бары өттүнэн табыгастаах   сып-сырдык, ураты истииллээх саҥа балыыһа  аанын олохтоохторго арыйда.

Балыыһа аһыллыытыгар СР Доруобуйа харыстабылын миниистирин солбуйааччы Бурнашева Любовь Степановна, “Таатта улууһа” муниципальнай тэриллии баһылыгын социальнай боппуруостарга солбуйааччы Сунхалыров Святослав Васильевич, Тааттатааҕы киин балыыһа кылаабынай бырааһа Кононова Сардаана Владимировна, СР Булгуччулаах медицинскэй страхование территориальнай фондатын директорын солбуйааччы Дьячковскай Прокопий Алексеевич ыҥырыылаах ыалдьыт быһыытынан кыттыыны ыллылар.

Балыыһа арыллыытын үөрүүлээх тэрээһинэ алгыс сиэрин-туомун толорууттан саҕаланна. Алгыһы кыраайы үөрэтээччи, нэһилиэк ытык олохтооҕо Сергей Федорович Кладкин иилээн-саҕалаан ыытта. Дьоро күҥҥэ сөп түбэһиннэрэн, доруобуйа харыстабылын эйгэтигэр күн бүгүн үлэлии-хамныы сылдьар үрүҥ халааттаах аанньалларга бар дьон ортотугар үрдүкү наҕараадалар туттарылыннылар. Ол курдук, балыыһа акушерката Яковлева Альбина Прокопьевна “Российскай Федерация Доруобуйа харыстабылын туйгуна” үрдүкү ааты ылла. Балыыһаҕа 50-нус сылын үлэлии сылдьар, уопуттаах биэлсэр, нэһилиэк дьоно бары ытыктыыр, сүгүрүйэр киһибит  Бучугасова Анастасия Романовна “Таатта улууһун доруобуйа харыстабылыгар кылаатын иһин” муниципальнай бэлиэнэн, ону сэргэ улуустааҕы киин балыыһа “Эмчит буолбут мин дьылҕам” диэн үрүҥ көмүс бэлиэтинэн наҕараадаланна.

Дьоро күн биир бэлиэ түгэнинэн саҥа балыыһа тэлгэһэтигэр мас олордуута буолла. Ыҥырыылаах ыалдьыттар, олохтоохтор, бэтэрээн үлэһиттэр, Тыараһа орто оскуолатын үөрэнээччилэрэ кыттыылаах хатыҥ мастары олордуу бу тэрээһиҥҥэ ураты суолтаны биэрдэ. Инникитин бу хатыҥнар ылсан, силигилии ситэн, балыыһа тиэргэнэ күөх суугуҥҥа сууланан, кэлбит эрэ дьону кэрэхсэтэр көстүү буолуоҕа.

Саҥа дьиэҕэ киирии үөрүүлээх тэрээһинэ минньигэс астаах остуол тула олорон  истиҥ кэпсэтиинэн түмүктэннэ. Нэһилиэк дьоно ааспыт кэми ахтан, араас кэмҥэ балыыһаҕа үлэлээн ааспыт дьону санаан, күн бүгүн үлэлии сылдьар коллективка,  балыыһа тутуутугар улахан кылааттаах улууспут киин балыыһатын салалтатыгар, улуус дьаһалтатыгар, олохтоох дьаһалтаҕа барҕа махталын  биллэрдэ. Эҕэрдэ ырыалар ылланан, оһуордаах үҥкүүнэн киэргэтиллэн, саҥа балыыһа үлэҕэ киирэр дьоро күнэ дьон-сэргэ өйүгэр-санаатыгар хаалар гына истиҥник ааста.

Галина ПОЛУСКИНА.

Кыйы.