Кыйы, кулууп, Лексекуна ... бу тыллар быстыспат сибээстээхтэр. Өр кэмҥэ кулууп директорынан үлэлээбит Татьяна Михайловна Лексекунаны Тыараһаҕа билбэт киһи суоҕа буолуо. Кини салалтатынан, тэрийиитинэн аата-ахсаана суох элбэх кэнсиэр ыытыллан, үгүс дьоро-мааны киэһэлэр тэриллэн кэллэхтэрэ. 
Татьяна Михайловна Лексекуна айылҕаттан айар-тутар талааннаах киһи. Кини Дьокуускайдааҕы  культурнай-сырдатар училищеҕа үөрэнэн, “кулуубунай маассабай мероприятиелар режиссердара” диэн идэни баһылаабыта. 1982 с. үөрэҕин бүтэрэн баран, Чөркөөх кулуубугар уус-уран салайааччынан үлэҕэ анаммыта. Сыл аҥара онно үлэлээн баран, төрөөбүт нэһилиэгэр, Тыараһаҕа кулууп директорынан үлэлии кэлбитэ. Онтон ыла харыс да халбарыйбакка, 29 сыл устата Кыйы кулуубун директорынан үлэлээбитэ. 
1996 с. “Тиэхэлэр-бэтиэхэлэр” диэн көр-күлүү бөлөҕүн тэрийбитэ. Бөлөх улуус, зональнай, региональнай, республиканскай көрүүлэргэ үгүстүк кыттыбыта. Үгүс элбэх дипломнарынан, анал ааттарынан наҕараадаламмыта. 
2002 сыллаахха Татьяна Михайловнаҕа  “Саха Республикатын культуратын туйгуна” үрдүк аат иҥэриллибитэ.
Кини дьон талаанын арыйар, түмэр, тэрийэр дьоҕурдааҕын таһынан, ыытыллыбыт дьаһалларын быыстала суох улуус, республика хаһыаттарыгар сырдатан кэллэ. 2009 сыллаахха Россия Суруналыыстарын союһун чилиэнэ буолбута. Тыараһатын дьонун-сэргэтин үгүстүк суруйууларыгар  киллэрэн, 2015 с. “Сыта-тура сыымайдаан” диэн кинигэтэ бэчээттэнэн тахсан, үгүс дьон биһирэбилин ылбыта.
Татьяна Михайловна билигин бочуоттаах сынньалаҥҥа да олордор, нэһилиэк общественнай олоҕор кыттар, кулууп үлэтигэр өрүү көх-нэм, сүбэ-ама буолар олорор наставникпыт буолар. 
#днталгыс #тааттакультура #культуравлицах #тыакулууба #кыйы #тыараһа #таатта